Suleqat pisinnassoq – kollega med vilje
Suleqat pisinnaasumi qitiulluinnartoq unaavoq, suliffitsinni immitsinnut avatangiiserigatta aammalu suleqatigiiorusuppugut pisinnaasut, toqqissisimanissamik isummaannaassusermillu sulissuteqartut.
Siunertaq
Suleqat pisinnaasumi eqqarsartaatsikkut ilorrisimaarnissaq, imminut toquttarnerup pinaveersaartinnissaalu ataatsimoorussaasumik susassareqatigiinnerlu aqqutigalugu suliffigisami piorsarneqassapput. Suliffeqarfigisarmi tassaavoq ulluinnarni takujuartarfigisarput aammalu immitsinnut malinaaffigisartagarput, tassanilu suleqat tujormippat aamma takuneqarsinnaasarpoq.
Tunuliaqut
Ruujorilerisup danskiusup, Jørgen Gullestrupip Austaliami SIK-mut assingusumi sulinermini paasisimavaa, sanaartornermi sulisuni imminut toquttarnerup qaffasinnerujussua. Nunarsuarmi kisitsisit takutippaat, imminut toquttartut affai sinnerlugit tassaasartut, systemimi, soorlu tarnikkut nappaatilinnut napparsimavinni, ilisarisimaneqanngitsut.
Tamanna tunuliaqutaralugu ”MATES in construction” pilersippaa. Ullumikkullu periusissiaq tamanna inunnit 300.000-inik ikinnerunngitsunik peqataaffigineqalereersimavoq. Peqataaffigineqarnera siammasippoq, tassa aatsitassarsiornermi, assartuisarnermi pilersuinermilu sulialinni Australiami aammalu New Zealandimi peqataaffigineqalereersimammat.
Inuit amerlasuut, annermik angutit; annerusumik ikiortissarsiortarsimanngillat arlaatigut tujormissuteqarsimagunik, ikiortissarsiornermi kanngusunnermik aammalu naqissuserneqarnermut attuumassuteqartinneqakkajuttarmat. Ilaatigut taamak eqqarsartaatsikkut toqqissisimannginnerit aanngajaarniutit atorlugit matoorniarneqartarsimasut aamma paasinarsisimavoq.
Suliffigisaq, taannarpiaavoq ulluinnarni suleqammik malinnaaviginninnissamik tunngaviliisoq. Taamaasillunimi suleqatigisap pissusilersuutaasa tujorminermik aallaaveqartumik allannguuteqarnersut nakkutigineqarsinnaammata, tamannalumi aallaavigalugu immitsinnut tapersersoqatigiinnissamik periarfissaqartinneqarpugut – taamaasillunilumi aamma ulluinnarni suut unnammillernartuusinnaasut aaqqiivigisinnaallugit.
MATES in Constructionip ukiut 16-nissaa ingerlasup takutippaa, ”Suleqammit suleqammut” tapersersoqatigiinneq eqqarsartaatsikkut peqqinnerulernissamut aammalu imminut toquttarnerup pinaveersartinnissaanut aqqutissaasoq.
Australiamiit Kalaallit Nunannut
SuPi-p maanna anguniagaraa MATES kalaallit sulliviinut suleriaasaannullu tulluussarnissaa. Soorlu assersuutigalugu uani nunatsinni najugaqavissut ”aasaaneranilu suliartortartut” eqqarsaatigineqarput. Suliffeqarfinni pioreersuni pissutsinik pitsaasunik pilersitserusuppugut, tassanimi siunertaalluinnarpoq suleqatigiit ilorrisimaarnerunissaat aammalu qanoq eqqarsartaatsikkut inissisimanitsinnik arajutsinaveersaarluta qulakkeerinninnissaq.
Suliffeqarfik
SUPI assannik isaassisuussaaq! Suleqammiit suleqammut. Suliffeqarfimmi arlaariinnik ”Ikiortitut” inissisimasinnaasunik peqarnissaq innersuussutigineqar-
poq. Taamaasilluni ”ikiortip” suleqammik naligisatut oqaloqatiginnissinnaanera anguneqarsinnaammat. Soorlu ilinniartup ittorisaminut saaffiginninnissaa ajornakusoorsinnaasarpoq – imaluunniit ittorisaq ilinniartuminut. Arlariinnik saaffissaqarsinnaanerup qulakkiissavaa ”naligisamik” saaffissaqartuarnissaq. Imaluunniit, suliffeqarfimmi toqqagassaqartariaqarpoq, taamaasilluni nammineq tatigisamut/-iluarisamut saaffiginninnissaq oqinnerulersillugu.
Inissisimanerit akisussaaffiillu
”Inissisimaffiit” marluupput. ”Ikiorti” – taannaavoq suliffigisami assammik isaassisuusartoq, taassumalu eqqummaariffigissavaa sulisut, ulluinnarni eqqarsartaatsikkut qanoq inissisimanerat. ”Attaveqaataasoq” taannaassaaq
”Ikiortip” innersuussiffigisassaa, ”Attaveqaataasullu” isumagissavaa, suleqatigisap suliffeqarfiup avataani oqaloqateqarnissaanik aqqutissiuinissaq. ”Attaveqaataasoq” suliffeqarfiup avataani innersuussissiffissanik/-ikorfartorfiusussanik ilisimaarinnissaaq innersuussisinnaallunilu.
SUPI aqqutigalugu suliffeqarfinni inuiaqatigiinnilu ikioqatigiinnerit suleqatigiinnerillu piorsarneqartuassapput.
Naatsorsuutigisat pisussaaffiillu
Naatsorsuutigineqartoq tassaavoq; SuPi suleqatigiit attaveqatigiinneruneranik eqqummaareqatigiinneruneranillu pilersitsissasoq, taamaasilluni tapersersoqatigiinnermik, tatisimaneqarnermik aallaaveqanngitsumik, allorassaaqatigiinneq.
SUPI suliffeqarfinni napparsimasoqannginneruneranik aammalu inissaqartitsinerunermik pilersitseqataassasoq siunertarineqarpoq – tassani eqqarsaatigineqarput, suleqatit ”katsorsarneqarnissamik” allatulluunniit ikiorneqarnissamik pisariaqartitsisut (soorlu inuttut ajornartorsiuteqarnermi, isumatsassimasoqartillugu (Depression) atornerluisoqartilluguluunniit). Taamaasilluni pisariaqartitsisimasup suliffeqarfimmiiginnarnissaa qulakkeerneqassaaq, taamaasillunilu ”aniguereernerup” kingorna nukittuninngorlutik uteqqinnissaat aamma anguneqarsinnaalluni.
